أجرى موقع تحيا مصر حوارًا خاصًا مع النجم الكبير تامر حسني، تحدث خلاله عن كواليس فيلمه الجديد "ريستارت"، وأسباب غيابه عن الدراما الرمضانية، وتفاصيل علاقته بالفنانة هنا الزاهد، بالإضافة إلى دعمه للمواهب الشابة، وتحديدًا الفنان أحمد بحر الشهير بـ كزبرة، كما كشف تامر حسني عن رأيه في الأغنية الشعبية وتكريمه للفنان أحمد عدوية في حفله الأخير. 

كواليس العمل مع هنا الزاهد ومحمد ثروت في فيلم " ريستارت"، وهل تفكر في تكرار التعاون معهما؟

الكواليس كانت رائعة جدًا، الجو كان بسيط ومليان طاقة إيجابية، وهنا الزاهد ومحمد ثروت كان دمهم خفيف جدًا، وحقيقي استمتعت بالشغل معاهم، بسبب الحالة الحلوة اللي كنا فيها نفسي أشتغل معاهم تاني في فيلم أو تجربة جديدة قريب.

تامر حسني غاب عن الدراما الرمضانية لمدة تجاوزت 11 عامًا.. هل تخطط للعودة قريبًا؟

أكيد، نفسي أرجع بمسلسل قوي جدًا ومختلف عن كل اللي قدمته قبل كده، تجربتي في مسلسل "آدم" أثرت فيا نفسياً بسبب أحداث العمل، لكن الحمد لله قدرت أتخطاها، حاليًا بفكر أرجع بدراما تليق بالجمهور وتكون فيها مضمون ورسالة جديدة.

كيف ترى تفاعل هنا الزاهد مع جمهورها على السوشيال ميديا؟

هنا الزاهد نشيطة جدًا على السوشيال ميديا، وبتحب تشارك جمهورها كل جديد، بتعمل فيديوهات وصور كتير وده بيخليها دايمًا قريبة من الناس، ده جزء مهم لأي فنان دلوقتي، وهي بتعمله بطريقتها الحلوة.

ما الرسالة التي يقدمها تامر حسني في فيلم ريستارت التي يحمل اسمًا غير تقليدي

الفيلم بيحكي عن حالة ناس كتير دلوقتي بقوا ممكن يضحوا بمبادئهم وكل حاجة في حياتهم عشان بس يوصلوا للترند أو يحققوا ريتش عالي، في ناس بتتنازل عن العلاقات، عن المبادئ، وكل ده عشان فلوس من وكالات أو رجال أعمال بيدوروا على المكسب السريع من التريند، الفيلم بيناقش ده وبيوصل رسالة مهمة.

إمتى تامر حسني بيعمل ريستارت لحياته؟

أنا بعمل "ريستارت" لنفسي كل يوم، أول ما بصحى من النوم بحاول أبدأ من جديد، وأبعد عن أي حاجة تضايقني، وده جزء من طريقتي في الحياة عشان أحافظ على نفسيتي وطاقة اليوم.

ما طبيعة علاقة تامر حسني بالفنانة هنا الزاهد بعد تعاونكما في أكثر من عمل؟

هنا الزاهد بالنسبة لي زي بنتي الصغيرة، قدمتها للجمهور وهي طفلة، ودلوقتي رجعت أقدمها وهي نجمة شابة، اشتغلنا سوا في فيلم "بحبك" اللي حقق أعلى إيرادات في تاريخ السينما المصرية، وكمان نجح جدًا خارج مصر، دلوقتي بنتعاون تاني في فيلم " ريستارت"، وإن شاء الله دايمًا في نجاحات سوا.

كيف ترى دعمك للمواهب الشابة مثل أحمد بحر الشهير بـ كزبرة؟

أنا مش بس بدعم الشباب، لكن بحب أديهم دفعة تساعدهم يوصلوا للجمهور،  كزبرة مثلًا موهوب جدًا، وحقق نجاح في وقت قصير، قدمته على المسرح رغم إنه كان متردد وخايف يواجه الجمهور، لكن شجعته والحمد لله نجح وأنا شايف إن معظم شباب الجيل ده موهوبين ويستحقوا الفرصة.

غنيت مؤخرًا لأحمد عدوية واتجهت للطابع الشعبي.. هل هو خط غنائي جديد لك؟

أحمد عدوية أسطورة، ومحدش يقدر يوصل لمكانته، أنا بحب أقدم كل الألوان، مش بالضرورة الشعبي التقليدي، لكن بحب أتكلم بلغة كل الفئات، الغنى بالنسبة لي وسيلة تواصل مع الناس، وبحب يكون عندي جمهور من كل مكان ومن كل الأذواق، ويا رب دايمًا أقدر أقدم حاجات أحسن وتليق بالجمهور اللي بيحبني.

كيف ترى التعاون بينك وبين الفنان رضا البحراوي في الدويتو الأخير؟

رضا البحراوي نجم كبير جدًا، وليه شعبية ضخمة، فكرة إننا نشتغل سوا على دويتو كانت خطوة حلوة جدًا، وأنا سعيد جدًا بالتعاون ده، الأغنية حققت تفاعل قوي، وقدرنا نوصل لجمهور واسع، سواء من جمهوري أو جمهور رضا، وده في حد ذاته نجاح لينا احنا الاتنين، مفيش مانع نكرر التجربة تاني في عمل جديد لو لاقينا فكرة مناسبة.